விடுதலைப் புலிகள் இயக்கத்தின் தீவிர உறுப்பினர்களான 60 போராளிகளுக்கு எதிராக அடுத்த சில வாரங்களில் சிறிலங்கா அரசாங்கம் போர்க்குற்ற வழக்குத் தொடுக்கவுள்ளது.

இவர்கள் போர்க்குற்றங்கள் மற்றும் மனிதகுலத்துக்கு எதிரான குற்றங்களை இழைத்துள்ளதற்கான தெளிவான ஆதாரங்கள் கிடைத்துள்ளதை அடுத்தே, இந்த நடவடிக்கை எடுக்கப்படவுள்ளதாக மேலதிக சொலிசிரர் ஜெனரல் சுகத் கம்லத் தெரிவித்துள்ளார்.

“பயங்கரவாதத் தடைச்சட்டத்தின் கீழ் நிலுவையில் உள்ள வழக்குகள் குறித்து ஆராய நியமிக்கப்பட்ட சட்ட ஆலோசனைக் குழுவே, இவர்களை சட்டத்தின் முன் நிறுத்துவதற்கான நடவடிக்கைகளை எடுப்பதற்கு முடிவு செய்துள்ளது.

தீவிரவாத விசாரணைப் பிரிவினால் விசாரிக்கப்பட்டு வரும் 80 இற்கும் அதிகமான விடுதலைப் புலிகள், தடுப்புக்காவலில் இருந்தபோது கூட பிரிவினைவாத செயற்பாடுகளில் ஈடுபட்டுள்ளதற்கான புதிய ஆதாரங்கள் கிடைத்துள்ளன.

இவர்கள் விடுதலைப் புலிகளின் செயற்பாட்டாளர்களுடன் தொடர்பு வைத்துள்ளது மற்றும் நாடுகடந்த தமிழீழ அரசை அமைக்கும் இரகசிய சதித்திட்டத்தில் ஈடுபட்டுள்ள புலம்பெயர் தமிழர்களுடன் தொடர்பு வைத்துள்ளது குறித்து தீவிரவாத விசாரணைப் பிரிவுக்கு நம்பகமான தகவல்கள் கிடைத்துள்ளன.

கடந்த ஜுன் மாதம் இடம்பெற்ற வவுனியா சிறைச்சாலைக் கலவரத்தின் போது இவர்களின் செயற்பாடுகள் வெளிச்சத்துக்கு வந்தன.

இவர்கள் தகவல் தொழில்நுட்பம் மற்றும், கைத்தொலைபேசிகள் மூலம் வெளிநாடுகளுடன் தொடர்புகளை வைத்திருந்தது, அவர்களின் ஆலோசனைக்கமைய செயற்பட்டது குறித்த ஆதாரங்களை தீவிரவாத விசாரணைப் பிரிவு கண்டறிந்துள்ளது.

அனுராதபுர, வவுனியா, மன்னார், வெலிக்கடை ஆகிய சிறைகளில் நான்கு புதிய உயர்நீதிமன்றங்கள் அமைக்கப்படவுள்ளன.
.
சட்ட ஆலோசனைக் குழு தமது விசாரணையின் போது தடுப்பிலுள்ள 300 விடுதலைப் புலிகள் பற்றிய ஆவணங்களைப் பரிசீலித்தது.

இவர்களில் 150 பேர் மோசமான குற்றங்களை இழைத்ததற்கான ஆதாரங்கள் இல்லாததால், புனர்வாழ்வுக்கு அனுப்பப்படவுள்ளனர்.” என்றும் அவர் மேலும் கூறியுள்ளார்.

நாடாளுமன்றத் தெரிவுக்குழுவில் இணைந்து கொள்ளும் என்ற உத்தரவாதத்தின் அடிப்படையில், தமிழ்த் தேசியக் கூட்டமைப்புடன் மீண்டும் இருதரப்புப் பேச்சுக்களை சிறிலங்கா அரசாங்கம் ஆரம்பிக்கவுள்ளதாக கொழும்பு ஆங்கில வாரஇதழ் ஒன்று செய்தி வெளியிட்டுள்ளது.

சமநேரத்தில் நாடாளுமன்றத் தெரிவுக்குழுவில் இடம்பெறுவது என்ற இந்தியாவின் உறுதிப்பாட்டுடன் இந்தப் பேச்சுக்களை சிறிலங்கா அரசாங்கம் ஆரம்பிக்கவுள்ளது.

இதுதொடர்பாக அண்மையில் புதுடெல்லி சென்றிருந்த சிறிலங்கா அதிபர் மகிந்த ராஜபக்ச, இந்தியப் பிரதமர் மன்மோகன்சிங்குடன் விரிவாக ஆராய்ந்துள்ளார்.

நேற்று புதுடெல்லிக்குப் புறப்பட்டுச் சென்றுள்ள இரா.சம்பந்தன் தலைமையிலான தமிழ்த் தேசியக் கூட்டமைப்பின் ஐந்து பேர்கொண்ட குழுவுக்கு மகிந்த ராஜபக்ச – மன்மோகன்சிங் சந்திப்பு தொடர்பாக, இந்தியா விளக்கமளிக்கவுள்ளது.

இதன்போது இருதரப்பு பேச்சுக்கள் மற்றும் தெரிவுக்குழுவில் சமநேரத்தில் பங்கேற்பதை இந்தியா உத்தரவாதப்படுத்தவுள்ளது,

தமிழ்த் தேசியக் கூட்டமைப்பின் தலைவர்கள், புதுடெல்லியில் முக்கியமாக இந்திய மத்திய அமைச்சர்கள் நாராயணசாமி, எஸ்.எம்.கிருஸ்ணா, தேசிய பாதுகாப்பு ஆலோசகர் சிவ்சங்கர் மேனன், ஆகியோருடன் பேச்சுக்களை நடத்தவுள்ளதுடன் இந்தியப் பிரதமர் மன்மோகன்சிங்கையும் சந்திக்கவுள்ளனர்.

புதுடெல்லி சென்றுள்ள குழுவில் தமிழ்த் தேசியக் கூட்டமைப்பின் நாடாளுமன்ற உறுப்பினர்களான இரா. சம்பந்தன், மாவை சேனாதிராசா, எம்.ஏ.சுமந்திரன், சுரேஸ் பிறேமச்சந்திரன், செல்வம் அடைக்கலநாதன் ஆகியோர் இடம்பெற்றுள்ளனர்.

தமிழர்களின் விடுதலைக்கான போராட்டம் இன்னமும் முடிவுபெறவில்லை. அவர்களின் ஆயுதங்களே மௌனிக்கப்பட்டுள்ளன.

திருநெல்வேலி பாற்பண்ணைக்கு முன்பாகவுள்ள நல்லூர் பிரதேச சபைக்குச் சொந்தமான காணியை நேற்று சபையின் அனுமதி எதுவுமின்றி அத்துமீறி அடாத் தாகக் கையகப்படுத்தினர் படையினர். இந்தக் காணியை படையினருக்கு வழங்குவதில்லை என நல்லூர் பிரதேசசபை அண்மையில் கூடி விசேட தீர்மானம் ஒன்றை நிறைவேற்றிய நிலையில் நேற்றுக்காலை படையினர் இந்தச் செயலில் ஈடுபட்டுள்ளனர்.

விடுதலைப் புலிகள் மீண்டும் தலையெடுப்பதை இந்தியா விரும்பாது என்று தேசிய சுதந்திர முன்னணியின் தலைவரும் சிறிலங்கா அமைச்சருமான விமல் வீரவன்ச தெரிவித்துள்ளார்.

இந்தியத் தலையீட்டுக்கு எதிராக குரல் கொடுத்து வந்த அவர், மன்னார், பெரியமடுவில் இரண்டாவது கட்ட இந்திய வீடமைப்புத்திட்ட தொடக்க நிகழ்வில் உரையாற்றிய போதே இவ்வாறு கூறியுள்ளார்.

“இப்போது விடுதலைப் புலிகளின் மரபுரீதியாகப் போரிடும் பலம் முற்றாகவே அழிக்கப்பட்டு விட்டது.

சிறிலங்காவிலோ இந்தியாவிலோ விடுதலைப் புலிகள் மீண்டும் தலையெடுப்பதை இந்தியா விரும்பாது.

விடுதலைப் புலிகளால் இந்தியாவும் கூடப் பாதிக்கப்பட்டுள்ளது.

எனவே, மீண்டும் அவர்கள் ஒன்றிணைவதற்கு இந்தியா ஊக்கமளிக்காது.” என்று அவர் மேலும் கூறியுள்ளார்.

சிறிலங்காவில் அகதிகளுக்கான ஐ.நா உயர் ஆணையத்தின் செயற்பாட்டு நிலைப் பணிகள் நிறுத்தப்படவுள்ளதாக, அகதிகளுக்கான ஐ.நா உயர் ஆணையர் அன்ரனியோ குரேரஸ் தெரிவித்துள்ளார்.

ஜெனிவாவில் நடைபெற்ற அகதிகளுக்கான ஐ.நா உயர் ஆணையத்தின் 63வது நிறைவேற்றுக் குழுவில் உரையாற்றியபோதே அவர் இவ்வாறு கூறியுள்ளார்.

எனினும், இந்தியாவில் இருந்து சுயவிருப்பின் பேரில் நாடு திரும்பும் அகதிகள் மற்றும் உள்நாட்டில் இடம்பெயர்ந்த அகதிகளுக்கு, தொடர்ந்தும் உதவிகள் அளிக்கப்படும் என்றும் அவர் மேலும் கூறியுள்ளார்.

திவிநெகும சட்டமூலத்துக்கு வடக்கு மாகாண ஆளுனர் மேஜர் ஜெனரல் ஜி.ஏ.சந்திரசிறி ஒப்புதல் அளிப்பதற்குத் தடைவிதிக்கக் கோரி தமிழ்த் தேசியக் கூட்டமைப்பு வழக்குத் தொடுத்துள்ளது.

வடக்கு மாகாணசபை இன்னமும் தெரிவு செய்யப்படாத நிலையில், வடக்கு மாகாண ஆளுனரின் ஒப்புதலுடன் திவி நெகும சட்டமூலத்தை நாடாளுமன்றத்தில் நிறைவேற்ற சிறிலங்கா அரசாங்கம் முற்படுகிறது.

இந்தச் சட்டமூலத்துக்கான ஒப்புதலை வடக்கு மாகாண ஆளுனர் ஏற்கனவே அனுப்பி வைத்துள்ளார்.

நேற்று கிழக்கு மாகாணசபையிலும் சிறிலங்கா முஸ்லிம் காங்கிரசின் ஆதரவுடன் இந்த சட்டமூலத்துக்கு ஒப்புதல் பெறப்பட்டுள்ளது.

இந்தநிலையில், சிறிலங்காவின் மேன்முறையீட்டு நீதிமன்றத்தில் தமிழ்த் தேசியக் கூட்டமைப்பின் நாடாளுமன்ற உறுப்பினர் மாவை சேனாதிராசா, வடக்கு ஆளுனரின் ஒப்புதலைப் பெறுவதற்குத் தடைவிதிக்கக் கோரும் மனுவைச் சமர்ப்பித்துள்ளார்.

13வது திருத்தச்சட்டத்தின் மூலம் மாகாணங்களுக்கு வழங்கப்பட்டுள்ள அதிகாரங்களை இந்த திவிநெகும சட்டமூலம் பறிக்கும் வகையில் அமைந்துள்ளது.

மக்களால் தெரிவு செய்யப்பட்ட மாகாணசபையின் ஒப்புதலின்றி இதனை நிறைவேற்றுவது, வடக்கு மக்களின் உரிமைகளை மீறும்செயல் என்று மாவை சேனாதிராசாவின் மனுவில் சுட்டிக்காட்டப்பட்டுள்ளது.

சிறிலங்காவில் போரின் இறுதிக்கட்டத்தில், இடம்பெற்ற அனைத்துலக மனிதாபிமானச்சட்ட மீறல்கள் தொடர்பான விசாரணைகளின் தற்போதைய நிலை என்னவென்று, அமெரிக்கா மீண்டும் வினவியுள்ளது.

நியுயோர்க்கில் சிறிலங்காவின் நீதிஅமைச்சர் ரவூப் ஹக்கீமைச் சந்தித்த அமெரிக்காவின் உதவி இராஜாங்கச் செயலர் றோபேட் ஓ பிளேக் இதுபற்றி அவரிடம் கேள்வி எழுப்பியுள்ளார்.

இதன்போது, சிறிலங்கா அரசாங்கம் எதையும் மறைக்காது என்று தாம் உறுதியளித்ததாக கொழும்பு ஆங்கில ஊடகம் ஒன்றிடம் ரவூப் ஹக்கீம் கூறியுள்ளார்.

திருகோணமலையில் 5 மாணவர்கள் 2006ல் சுட்டுக் கொல்லப்பட்ட சம்பவம் தொடர்பான விசாரணைகள் மீள ஆரம்பிக்கப்பட்டுள்ளதாகவும், குற்றவாளிகளுக்கு எதிராக வழக்குத் தொடரப்படும் என்று உத்தரவாதம் அளித்ததாகவும் ரவூப் ஹக்கீம் தெரிவித்துள்ளார்.

கிழக்கு மாகாணசபைத் தேர்தலின் பின்னர் தேசிய அரசு அமைக்க தமிழ்த் தேசியக் கூட்டமைப்போ, சிறிலங்கா அரசாங்கமோ ஆர்வம்

காட்டாததால் தான் தாம், ஆளும்கட்சியுடன் இணைந்து ஆட்சியமைத்ததாக, சிறிலங்கா முஸ்லிம் காங்கிரஸ் தலைவர் அமைச்சர் ரவூப் ஹக்கீம் அமெரிக்காவிடம் கூறியுள்ளார்.

ஐ.நா பொதுச்சபைக் கூட்டத்தில் பங்கேற்க நியுயோர்க் சென்ற ரவூப் ஹக்கீம், அங்கு அமெரிக்காவின் உதவி இராஜாங்கச் செயலர் றொபேட் ஓ பிளேக்கை சந்தித்துப் பேசியுள்ளார்.

இதன்போதே ஆளும் ஐக்கிய மக்கள் சுதந்திர முன்னணியுடன் இணைந்து ஆட்சியமைத்ததற்கு நியாயம் கற்பித்துள்ளார்.

“மாகாணசபைகளுக்கான அதிகாரப்பகிர்வின் அவசியத்தையும், இனப்பிரச்சினைத் தீர்வின் முக்கியத்துவத்தையும் கிழக்கு மாகாண சபை தேர்தல் முடிவுகள் வெளிப்படுத்தியுள்ளன.

மாகாணசபைத் தேர்தல் முடிந்தவுடன் நாம் சிறிலங்கா அரச தரப்பினருடனும், தமிழ்த் தேசியக் கூட்டமைப்புடனும் நடத்திய பேச்சுக்களின் போது , தேசிய அரசாங்கத்தை அமைக்க வலியுறுத்திய போதிலும், இருதரப்பினரும் அதில் அக்கறை காட்டவில்லை.

இந்தநிலையிலேயே தற்போதைய அரசியல் சூழல் மற்றும் முஸ்லிம் சமூகத்தின் நலன் கருதி கிழக்கு மாகாணசபையில் ஆட்சிமைக்க, ஐக்கிய மக்கள் சுதந்திர முன்னணிக்கு ஆதரவளிக்க முன்வந்தோம்.

நாடாளுமன்ற தெரிவுக்குழுவில் தமிழ்த் தேசியக் கூட்டமைப்பை உள்வாங்கினால், இதுவரை தீர்வு காணப்படாத பல்வேறு பிரச்சினைகளில் உரிய கவனம் செலுத்த முடியும்.

இனப்பிரச்சினைத் தீர்வு தொடர்பான எத்தகைய பேச்சுக்களிலும் முஸ்லிம்களும் தனித்தரப்பாக பங்கேற்ற வேண்டும்.

விடுதலைப் புலிகளைப் போன்றே, தமிழ்த் தேசிய கூட்டமைப்பும் பேச்சுக்களில் முஸ்லிம்களைத் தனித்தரப்பாக ஏற்க மறுக்கின்றது.

சிறிலங்கா அரசுடன் தாம் பேச்சுக்களில் ஈடுபடுவதாகவும், முஸ்லிம்கள் தம்மோடு பிரச்சினைகள் குறித்து பேசலாம் என்றும் அவர்கள் கூறிவருகின்றனர்.

தமிழ்த் தேசியக் கூட்டமைப்பை முஸ்லிம்கள் தமது பிரதிநிதிகளாக ஏற்றுக் கொள்ளப் போவதில்லை.“ என்றும் ரவூப் ஹக்கீம், அமெரிக்க உதவி இராஜாங்கச் செயலர் பிளேக்கிடம் கூறியுள்ளார்.

கிழக்கில் தமிழர் ஒருவரை முதல்வராக்கும் அமெரிக்காவின் முயற்சியை தாம் சிறிலங்கா அரசுடன் இணைந்து முறியடித்திருந்ததாக சிறிலங்கா முஸ்லிம் காங்கிரசின் நாடாளுமன்ற உறுப்பினர் ஹாரிஸ் கடந்தவாரம் நடத்திய செய்தியாளர் மாநாட்டில் கூறியிருந்தார்.

இதற்காகவே தேர்தல் முடிந்ததும், பிளேக் கொழும்பு வந்ததாகவும் அவர் தெரிவித்திருந்தார் என்பது குறிப்பிடத்தக்கது.

தமிழ்நாட்டில்விடுதலைப் புலிகள் இயக்கம் வலுவடைந்து வருகிறதா என்பது குறித்து இந்திய மத்திய அரசு, உன்னிப்பாகக் கவனித்து வருவதாகத் தெரிவித்துள்ளார் இந்தியப் பாதுகாப்பு அமைச்சர் ஏ.கே.அன்ரனி.

புதுடெல்லியில் நேற்று, இடம்பெற்ற இராணுவ நிகழ்வு ஒன்றையடுத்து செய்தியாளர்களிடம் பேசிய போதே அவர் இவ்வாறு கூறியுள்ளார்.

தமிழ்நாட்டில் விடுதலைப் புலிகள் இயக்கம் வலுவடைந்து வருகிறதா என்று இதன்போது செய்தியாளர் ஒருவர் கேள்வி எழுப்பியிருந்தார்.

அதற்குப் பதிலளித்த இந்தியப் பாதுகாப்பு அமைச்சர், ஏ.கே. அன்ரனி, இந்திய மத்திய அரசு, உன்னிப்பாகக் கவனித்து வருகிறது என்று  சுருக்கமாகக் குறிப்பிட்டார்.

அதுபற்றி மேலதிகமான விளக்கம் எதையும் கொடுக்கவில்லை.